26.11.09 – Ylli Hoxha, kotar o Klubi vash e Avriyaluni Politika vakergya kay o phanipe e kampengo “Qesmin Lug” thay “Osterode” ani teritoria e Mitrovicaka Komunako, na sile molipe buderi desar dersh milionya euro…….

Klubi vash e Avriyaluni Politika rodingya o phanipe e kampyengo kote jivdinena o roma ani Kosova. Isi dersh bersh kay pashe 700 roma, kola nashte kotar o ververutne thana e Kosovake, jivdinena ano kampya “Qesmin Lug” thay “Osterode” ani teritoria e Mitrovicaka Komunako. Ko tetradi, Ylli Hoxha kotar o Klubi vash e Avriyaluni Politika vakergya kay o phanipe akale kampyengo na astarla o molipe buderi desar dersh milionya euro.”Sito o fondi kova lokhipeya e kosova thay olake amala shay te keren, numay vash te kergyol akava musay yekh may decisimo akti e Kosovake Guvernipesko, kova ji akana na ulavgya niyekh vastushi vash o phanipe akale kampyengo, so na sito laqhi misal vash o avera”, potencingya o Hoxha, ani yekh konferencia khardi special vash o na alosaripe e problemyengo e romane kampyengo ani upruni Kosova. Ov vakergya kay o Kosovako Guvernipe ini kay duy ver dikhlargya poro bujeti ko nakhle shov qhonya, sinelen shaipe kay palo deklaripya sar prioritetya te ulavel fondya vash o puqipe e romane kampyengo. Numay, sar si pe Hoxha, oy na sinele suksesi te kerel akava. “Akava momenti musay te vastingyol vash te kergyon presie mamuy o Guvernipe vash te anel e decizia vash o ulavipe nesave fondyengo kola siton urgentune vash o manushengo evakuipe kola jivdinena ano dola kampya, thay savore aver akterya, kay silen shaipe te azhutinen, leindoy kotor vi e Evropaki Komisia, koya sitoy ano decizipe vash o ulavipe yekh e kotoresko olake fondyengo vash o phanipe e kampyengo”, vakergya o Hoxha. Shaip Muya, konsulenti e Kosovake sheruneministresko, Hashim Thaqi, thay koordinatori e Proyektesko vash o phanipe e romane kampyengo, ano mayi akale bershesko dengya lafi kay o kampya ka phangyon vash trin-shtar qhonya thay kay o lokaluno guvernipe khetane e centralune guvernipeya ka dikhlaren e romen vash te ovelolen beshipe, sastipesko sevaluipe, higienako sevaluipe thay edukipe. “Pakyaha kay akava proyekti ano yekh vahti kotar shtar-panj qhonya ka ovel realizimo thay o duy kampya upre te phangyon”, vakergya odoya ver o Muya, ani konferencia e KAP-ki ko 26 mayi akale bershesko. “Sitoy yekh deklaracia dendi bosh, ani yekh konferencia, vash o publikako konsumipe thay nota sitoy numay akaya: vay sinemen e doza e naivitetesko vash o na kanleipe e situaciako, vay sinemen na godornipeske elementya, kola qhivde e raye Muya te kerel ayekha deklaracia. Kova te ovel, mothavela vash yekh skala e naserioziteteski e Kosovake Guvernipeski vash o kampengo treteripe”, mothavgya o Hoxha. Ov vakergya vi kay o Kosovako imazhi hasardilo zorale e romane kampyencar ani upruni Kosova.

Mashkar aver, o Hoxha mothavgya vi e KAP-ko pratsav vash o raporti phanglo e negociaciencar e Kosovake instituciengo e Germania vash o iranipe e dershushtar mile azil manglarnengo ano germaniako them, kolendar dershuduy mile personya siton roma. “O iranipe e romengo ani kosova mangela te mothavel vash olengo iranipe ano kondicie e jivdipeske ano kampya” mothavgya poro godinipe o Hoxha anglo kosovake thay germaniake negociacie. Ov vakergya kay sito nagodornipe kay e aktualune politikune sistemeske ani Kosova te dengyol o obligipe vash o akomodipe e dershuduy mile romengo kola avena kotar e Germania, feri so o Kosovako Guvernipe na sito gatisardo te kerel akava vash o roma kola siton ani Kosova, sar si o kampya ”Qesmin Lug” thay “Osterode”. ”Siam darakerde vash e neglizhenca kay kergyola vash akava problemi ini kotar o politikune faktorya ani Kosova, kola na vazdena akava puqipe sar problematikuno”, vakergya o Hoxha. Numay, o rodlarno kotar o Klubi vash e Avrialuni Politika (KAP) Driton Sula, ano kuadri e yekhune prezentipesko vakergya kay ano Mitrovicake kampya isi yekh humanitaruni kriza. “Ano amaro rodlaripe, pashe odoleske kay na si politikuno mangipe vash o alosaripe e kampyenge problemyengo, sitoy vi yekh humanitaruni kriza, kote so dikhlam amen kay sitoy yekh but bilaqhi situacia” ikalgya ano dikhipe o Sula. Ov vakergya kay bilaqhi situacia sitoy may but ko qhavore,”kola dive palo dive kontamingyona thay o aqhavipya siton but bare. O Nasvalipya kay avena palo kontaminipe siton but rizikune, kote may but siton rizikime o khamne romnya thay qhavore. Niso nane problemi e kampyengo so sito problemi e vishipesko (kontaminipesko)”, vakergya o Sula kova anglo duy kurke vizitingya o kampya ani upruni Mitrovica. Ko mashkar vahti, e aver rodlarni kotar o KAP, Besa Luci, vakergya kay o kontaminipe e dizunengo bayrola so may but. “Sar si pe Lumiaki Sastipeski Organizacia, o rizikipe e kampenge dizunengo anglal o kontaminipe bayrola te sine kay on na silen o primarune jivdipeske kondicie, sar si o higienake kondicie, jivdipe ano barake, nanipe e uravipeske sheyengo, akcesi ano bunishte, nanipe e adekvatune hapepiipesko…. ”, vakergya oy. Luci vakergya kay te sine kay na ulavgyola yekh specialuno fondi, zori kay ka adresingyon o specifikune musaipya e dizunengo kotar o “Qesmin Lug” thay ”Osterode”. “Vash o sebepi e kondiciengo kote on jivdinena silen mangipe vash umlavde shaipya”, cidingya e sama e rodlarni kotar o Klubi vash Avriyaluni Politika.

Izvor: RTK

Advertisements