27 Februari 2009 – Biumlavdi BRO Chachipe, angleder Romano Them, mothavela piro nashukaripe ano mudaripe, ko naklo Luyino dive, e 27 bersheske purane Romeske thay leske 5 bershune qaveske, kova avela sar yek seriya planirime atakengo kontra e Romenge ani Hungariya. E organizaciya maybut shokirimi palo perfiditeti e manushengo kola kerde atako, kote yekto tarde yag ano kher thay payarde upari lende keda o manusha rodinde siguripa e yagatar  avriyal e keherestar. Panglo e mediyenge informaciyencar, duy (2) chave pobuter isi kuvde.

Ini kay e organizaciya isila jandipa, kay panda rano te denpe finalno konkluziye palo manusha kola kerde akava kriminali thay palo akharibe yeke sigutne thay biumlavde policyake investigaciyake, pendilo panda kay nashti te nashelpe palo keripa e pandlipasko mashar akava mudaripa e Romengo thay zoralipe e Radikalno hakayesko ani Hungariya. Pohari kotar o duy kurke, palo mudaripe e nacionalno hendbolesko timeske manushesko kotar o Roma, participantya kotar e neo-fashistichko Hungariyake gardake mothavde kay ka mudaren e Romen.

Chachipe mothavela piro seriosno nashukar gendipa palo akale divege vakeripa e reprezentengo kotar e Hungariyaki polikaki elita, kote  dena referenca palo Roma sar kriminalcya. Keripa komparaciya e situaciya ani Italiya, kasko Uqo Ministeriyumesko manush Ministari Berlusconi kergya muklipe pali kreaciya e civilno gardake, thay kote e nayucho Rimesko komunako manush,  kova avela kotar e neo-nacionalno fashistichka Allianza Nationale, mangela so popashe te kerel dikhipe e thanske kote beshena o Roma, thay te kerel bimuklipe e vizitengo palo akshami, Chachipe phenela kay ka ovel nenormalno tena oveltut nashukar gendipa palo akava sa so ovela.

“Roma na bisterde so ulo ano 1930 thay ano 1940,” organizaciya phenela. “Gendinipa pali odoya vrama panda jivdo, thay odova speciyalno palo nevo baryardi zor thay paldipe ano 1990 bershenge thay ano etnikuno suzaribe e Romengo ani Kosova.”

Organizaciya akharela ano nevo putariba e biagosirime investigaciyengo e desh (10) mudaripa e Romengo ani Hungariya, kola ule ano 2008 bersh. So majdur akharelape ji ko politikune reprezentya thay publikuno personaliteti ani Evropa te vakeren kontra e rasizmesko kova ovela ando Roma. Panda akharelape ano regularno monitoring-dikhipe e rasizmesko thay bikamlo krimesko kontra e Romenge, thay phenela kay akava shay te ovelpunmto e butikeripasko e Evropake Agenciyako palo Fudamentalno Hakay thay OSCE.

Ano anualno manushikane hakayengo reporti kova isine publicirimo-ikaldo tetradzi, US Departmamenti diklargya yek pobaro sociyalno zoripe kontra e Romenge ano disave phuvya, kote akate qivelape e Italiya thay e Hungariya. Zor palo Roma ovela pobuter frekvetno thay pobuter mudaripasko, reporti phenela.

Chachipe