Prizren, 9 Aprili 2008 – Ulavipeya e phinengo-znaqkengo kova sinele andripe e romane bayrakosko thay informatoresko e andripeya so ulo pe akaya mahatni data vash sa o Roma ani Sumnal, startinde o manifestipe akale divesko o Kosovake Roma ani olaki sheruni diz Prishtina. O manifestipe phravgya o sheruno e ofisesko e Kosovako ministriako vash shukar halovipe o r. Habit Haradinay kova vakergya vash o jiakanutne resipya thay ledipya mashkar akava ofisi thay romano komuniteti.

O lafi lela ini o ministri vash o edukipe o r. Enver Hoja kova dengya lafi kay olesko ministripe pe avipe si te kerol seriozitetya buti vash akava komuniteti, leparipeya o tiknaripe e gendosko e qhavorengo kola si avri e shkolake bankemgo, anafalbetizmi thay baryaripe e gendosko e romane studentyengo ano Prishitinako univerziteti, kolenge ano sasavo aspekti si te lokyargyol olengo registripe ano akala fakultetya.

E r. Enesa Kadiq koya si shefi e Sektoresko vash o komunitetya tali Ministria vash Edukipe, phengya kay olako sektori pe avutne bersha si te adikerelpe e hramime dokumenteya vash strategiya e edukipeska koponentaha vash olako inpelementipe, sikavipeya kay anglune bajakya ovena, startipea monitoripe olake inplementipesko. Pe lugipe e r. Kadiq lepargya kay o Kosovako guvernipe si gatisarno te ulavel 55% e bijetesko kobar si dikhlardo ano proyekti vash i strategiya ajukeripeya ini 8 % e kotar o lokalune guvernipya thay 37% kotar o avrune donatorya, love kolencar manglape te inpelentingyol e strategiya vash Integripe o RAE komunitetyengo ani Kosova 2007/2017.

Vash o ji akanutne resipya thay ledeipya e kosovake instituciyencar thay romano komuniteti vakergya ini o romano deputeti ano Kosovako Parlamenti o r. Haji Zulfi Merja vay kotar o romano civilyuno sektori o r. Osman Osmano.

Palo vakeripya e jenenge kola lele kotor pe manifstipe ano Prishtinako kulturako kher “DODONA”, sikavdile kulturune performanse e romane komunitesko. Odova oktetyuno gilavipe e purane romane gilengo thay drabaripe e poeziengo kotar o poeti Kuytim Paqako thay kelipe e e dramako kotoresko “Ano Drom” kotar o autori Hilmi Yashari kolaki rejia kergya o romano dramaturgo Nejip Menekshe sine performanse kola ande bare inpresiya e dikhavnenge.

O manifestipe sine talo patronati e Kosovako ofisesko vash shukarphiravipe koleske generalipeya suporti dela e Kosovaki Fondaciya vash Putardo Malipe (Soros), Shvaycariako Caritasi-Prizren, Ministria vash Edukipe, Amerikako ofisi ani Prishtina thay Ministria vash i Kultura Terne thay Sporti.

Advertisements