Ano organizipe e NDI-ako, Kosovako Demokrativuno Instituti thay Centro Vash Intergripe e Minoritarune komunitetyengo ano Prizren adikergyola debata e temaha “Hako e komunitetyengo thay olenege reprezentynego” ano rami e pyblikuna diskusiyako phanglo e hramipesko e draft Kosovaka Konstituciyako.

Ani debata vakergya o ministri vash ruraluno truyalipe thay thanesko planifikipe Mahir Yagjilar kova ano indetikuno vahti si ini som jeno e Komisiako vash i Konstituciya, palo oleste o som jeno deputeti ano Kosovako parlamenti kotar o egipqanyuno komuniteti o Jevdet Nesiri thay odova kotar o bashyakya Bayram Latifi. O reprezente pe khedipe kotar o komunitetya Boshnyakya Turkya thay Roma thovde puqipya e som jenenge e komisiyake vash i Konstitiuciya deipeya sugestiye thay rekomandipya.

Pe khedipe e Prizrenoske dizutnencar palo sikavipe e som jenengo kola si ani komisiya vash hramipe e Kosovaka Konstituciyako, kay reso so ola si akate kay te len o godinpya, propozipya thay komentipya, startinla ini o puqipya kote mashkar yekh e puqipyandar sine kotar o romano shuranalisti so seske o drafti na si irando pe romani qhib? O deputiti egipqanyune komunitetske o rayo Neziri startungya te vakerol kay si o problemi o kuadro e jenengi kotar o romano komuniteti vash iranipesko e draftesko, na janipeya konkretno kay vash akava iranipe iniciativa lela o USAID thay kay si keripea buti ano akava smeri so sikavgay o ministri Yagjilar. Pe agor ini a yaver informipyendar la pe janipe kay o drafti si iramo thay akale divende ajukergyola te iklol ani web-rig ini pe romani qhib.

Mashkaro yaver puqipya kola thovgyona kotar o reprezentne jene kola sinelen resipe may centralipeya vash garavipe e daka qhibyako sar ini edukipe , o ministri Yagjilar respodingya kay sitov janipeya kay odova si centraluno problemi e sa komunitetyengi ani Kosova thay kay manglape te jangyol kay o parlamenti aprovingya o plani e Ahtisaresko, kova ano buderi kapitulya dela garanciya e savore komunitetyenge akete ulavipeya may buderi garancie vash o Kosovake srbya.

Lunyako diveste ano Centro vash Intergripe minoritarune komunityengo kova si korkoro organizatori e oratar 11:00 ka adikergyol pandar yekh debata e Prizrenoske dizutnencar e temaha draft dokumenti e Kosovaki Konstitucia.

Advertisements