Haji Merja: “Romalen ikloveni, loshaloven i, hani piyeni bizo nisavi dar, akaya na si numay e albanyengi festa, vay e savore Kosovake dizutnengi.”

Prizren, 15.02.08 – Sheruno e Kosovaka Romana Partiyako yekhatar ini deputeti ano kosovako Parlamenti haji Zulfi Merja, khargya prekal radio talasya e romane radioske “Romano avazo” sa e dizutnen e romane komunitetske kay ano dive e anavipesko e Kosovake biumlavipesko masiviteteya te phanglon pere bereber dizutnencar ano ketanyuno manifestipe e lafyencar “ikloveni, loshaloveni, hani piyeni bizo nisavi dar thay laj, feri so akava na si numay e albanyengi vay festa e savore Kosovake dizutnengi”.

Leipe kotor ani yekh oryuni remisiya ano radio “Romano Avazo” kola sinela tema festuipe e divesko anavipe e Kosovake biumlavipesko, deputeti haji Merja, phengya kay ov ka iklol para familyaha thay sa pere partiyake somjenencar, kote yekhune dromea khargya sa e dizutnen kay te tromalingyon e daratar thay te iklon sikavipea loshalipe e savore khetanyunen dizutnecar te hraminen thay te festinen akava mahatno istorikuno dive.

Ano shurnalistesko puqipe: so ka len o Roma palo biumlavipe kotar e rig e kosovake instituciye avipeya ini e neva misiako ani Kosova reprezentne kotar o rashtre e evropaka uniako, o haji Zulfi phengya kay e ekonomikuni situaciya ko Roma si te laqargyol thay olengo avipe si te ovel mayshukarno, akate godingyola ano politikuno reprezentipe e Romanego, palo odova yakh bajarko e laqaripesko ano edukipesko umal, ano sfera e garavipesko e manushikane hakyango koleya si te anel ini pozitivuni mol ani mayshukarni integraciya amare komunitetsko ano kosovako malipe.

E nakhle dikhipyendar thay shunipyendar kotar o shunavde thay shurnalistya kay o UNIMK thovla o hrami pe lil kay ano masek mayi akale bersheste ka irangyon pashe 34 mile Roma kotar o ver ver barvale evropake rashtre, o haji Merja dengya respodipe kay niyekh Rom nashti irangyola te sine ole na sile khefi thay sikavla mangipe vash iranipe. A kana si o lafi vash interno nashle manushengo ola kola mangena te iranenpe tromalipeya shay te irangyoven potenciripea kay sa odole personyenge kola mangna te iranenpe kay kergyon neve khera thay ka pashargyon may shukrne jivdipaske kondiciye.

O Haji Merja deipe respodipe ano puqipe, soske na si romane reprezentya ano instituciye thay kay nesave problemya e romane komunitetske vakergyona phangle vudarencar, ov negirinla ayekha informipya vakeripea kay akava na si qaqipe thay ka sakoya ver si manush amara partiyatar kova sitov phanglo ano procesi kola si phangle ano kheripe e Kosovaka Konstituciyako. Ov si o rayo Albart Kinoli kova dengya lafi kay ano resursi e sa romane komunitetske kola silen khefi ta ovalelolen janipe thay may buhle informaciye kobar vakergyola vash o romane problemya ano procesi e hramipesko thay anipesko e Kosovaka Konstituciyako.

“Romano Avazo”