Putardo lil medienge thaj Bordeske REF ani Budimpešta

BEOGRAD, 30.11.2007

Palune 4 maseka akele beršeste, romani informativno organizacia Rominterpres kotar Beogradi, aktivno kergja buti ani koncepcia Projekteski “Produkcia thaj promocia REF-eske edukuibaske programia vaš Roma ano Regioni”.

Anglune vakargjam e rajina Tinde Kovač Cerović, dženo Bordesko REF ani Budimpešta, o Projekti te ovol 3 berša, a palo odova rajo Rumijan Rusinov dženo leparde REF-esko Bordi kotar Bulgaria, denga sugestia te ovol Projekti potikno jekh berš, so ini amen lelam.

Akava Projekti “registruingjam” vaš nakhlo bešipe REF-esko, savo adikardilo ano maškar e novembaresko, numa rajina Tinde Kovač Cerović na vakargja vaš ov ano bešipe, soske sar phengja na bičhalgjam ole po vakti, so nane čače, a so šaj te dikholpe kotar e-maili kana bičhalgjam ini kana e Nataša Kočić Rakočević fascilitatori kotar Srbia lela ole. Odova angluno ano nići bičačipe savo ka ovol.

Palo odova olenda duj džene lelam informacia kaj manglape o Projekti pana te phera, so ini amen kergam. Anglo nekobor dive lelam informacia e Tinde Kovač Cerović, kaj Projekti ka ovol dikhljardo ano bešipe Bordesko ano decembri, numa kaj manglape pana diso te pherolpe, maškar aver: kaj musaj te anava dženo save ka angažuina sar ekspertsko konsultatnti, sar ini odova kaj REF manglape te dol scenario sar ini finalno materiali angli distribucia emisiengi. Ini kaj amenge akava so paluno rodinde, na sine šuže, avazingam ini odolea.

Avdive vakargjam e Nataša Kočić, savi phengja amenge te vakara e Tindea, vaš te dol amen turvinutnipe ko šaj te ovol odova ekspertsko konsultanti, so ini kergam.

A palo sa odova šok, so ini adžukargjam, numa na paćavgjam kaj Tinde Kovač našti pedo na džana ni kova drom, te cidol sa odova so amen bahamina a vaš soske ini oj ini Rumijan Rusinov sar ini Nataša Kočić, vakarde kaj vaš disavo dive, manglape te ovol ano bešipe Bordesko thaj odote ka dikholpe šaj mi te realizuina projekti jase na.

Sar ini angle nekobor berša, Tinde Kovač Cerović, kana sine ažutindo Minsitresko vaš edukuibe, ini kana pere hramiba ačhavgja jekhtuno romano lil vaš čhavore ano Balkani, kana phangla skole vaš pana edukuibe, savi nekobor berša kerga buti ano Rominterpres, ačhavgja Romano lil sar ini ekspertsko lil Romološke studie (vaš soske siamen dokumenti save šaj te dikhen kana ovena ano sajti, vaš te paćan kobor odoja rajina kergja bilačhipe), ini akava drom Tinde Kovač vakargja amenge kaj konsultingjape e direktorea REF-esko Alexander Marče, savo nane Rom već Francuzi, ini kaj ov denga nota kaj adjahar Projekti ano akava momenti na kamlape te realizuinolpe.

Čhinadipe kotar adjahar pratsav odova so dži nadur kotar REF na kamena varesavi organizacia te dikhol so on odote kerena, a majhari romano them. Kotar odova siamen pherde ispatia, adjahar kaj jekh po jekh ka mothava. Džana kaj but Roma siolen esavko ini pana pobilačhe empirie akale Fondea, odoleske bahamina kotar akava te legara diskusia, vaš te dikha diso te prmina ano funkcionišibe adjahar organizaciengo ano avutno periodi.

Džana ini odova, kaj amaro reaguibe e rajina Tinde Kovač na ka čalavol, soske nakhela e bukja ano aver than, numa amari obligaca kaj savore tumen manglape te dikhen save dženen anavena ano thana kote kotar Roma anelape pratsav.

Soske nijekh dženo e Romenda kotar Srbia nane anavdo vaš dženo REF-esko Bordi, već on musaj te anaven aver daj dženo vaš savo džanelape kaj biamal e Romengo, vaš soske ka da tumenge dokumentia, a tumen kokore ka  dikhen odova.

Savore tumen save mangena te roden ažutipe e REF-esta kotar Budimpešta, mothava kaj manglape te džanen vaš džene save kerenape kaj ažutinena e Romenge, soske, te sine kaj po vakti na trada olen, ka ovol tumen jekha jekh avutnipe sar so sine amen kotar Rromintepres. 

Ka avazinen on disave projekta, numa, ka den odola Projekta pedo principi negativno selekcia thaj ka hasan tumenge ano muj, a tumen našti khonik te keren, soske ano olenge vasta ini čhurik ini maro.

Kana e Dekada inkluzia Romengi ka agorisinolpe, ka hasan odola džene pedo amen so kerde baro bajo e Romenge, vakariba amenge kaj sine amen šansa numa kaj amen na džangjam te la ola.

Tumenda rajalen Roma, adžukarava ani adresa REF-esko Bordi te bičhalen tumare gndipe, soske manglape ano disave forme te prmina avutnipe savo beršenca kerena amenge aver džene. Na sine olenge pherde odova so šelberšipa uškavde amen, a akana mangena ini odova hari so e lumia denga amenge, te len amenda, garaviba odova, sar so sito ani akaja situacia, e publikata so on kerena.

Džana kaj akava so vakargam, odolenge so kerena bajo vaš Roma, na ka čalavol olen, numa amari obligacia te mothava kaj džana odova ini kaj da davia olenge vaš adjahar bukja, soske ano odola forme avutnipe amare čhavengo uškavena on save nanolen pedo odova ni majhari hakaj.

Teloprezidento Lumiake Parlamentesko e Romengo

Direktori Rrominterpres

Dragoljub Acković